Jiya ranar 17 ga wata, yayin taron manema labaran da aka yi a Bujumbura, babban birnin kasar Burundi, shugaban kasar Pierre Nkurunziza ya ce, a shirye yake na yaki da harin ta'addanci da kungiyar Al-Shabaab ta Somaliya za ta kawo kasar, wannan shi ne karo na farko da shugaba Nkurunziza ya yi jawabi a bainar jama'a, tun bayan da tsohon shugaban hukumar leken asirin kasar Godefroid Niyombare ya yi yunkurin kifar da gwamnatinsa wanda bai yi nasara ba.

Shugaba Nkurunziza ya ce, sun samu labarin harin da kungiyar Al-shabaab ke shirin kaiwa Burundi, wadda ta tura sojoji zuwa tawagar musamman ta AU dake Somaliya. Yana mai cewa, ya kamata kasar ta yi hattara game da harin ta'addanci da za a kawo. Baya ga wannan kuma, a cewarsa, ya riga ya tattauna wannan batu tare da mahukuntan kasashen Kenya da Uganda wadanda su ma suka tura sojoji ga tawagar AU a Somaliya.

Bisa labarin da gidan rediyon kasar Burundi ya bayar a ranar 15 ga wata, an ce, yunkurin kifar da gwamnatin da Niyombare ya jagoranta bai yi nasara ba.

Rahotanni na cewa, a ranar 16 ga wata, an gurfanar da mutane 18 da aka kama da hannu a shirin juyin mulkin gaban kuriya, amma har yanzu, ba a san inda Niyombare yake ba.(Bako)