Cibiyar nazari ta Pew da ke Amurka ta fitar da wani rahoto, wanda ya bayyana cewa, daga shekarar 2010 zuwa shekarar 2050, yawan mabiya addinin Musulunci zai karu da kashi 73 cikin 100, kila addinin Musulunci zai maye gurbin addinin Kirista don zama addini mafi girma a duniya bayan shekarar 2050.

Bisa kididdigar da aka samu, an ce, yawan Musulmai a duniya zai karu zuwa biliyan 2.8 a shekarar 2050, yayin da wannan adadi ya kai biliyan 1.6 a shekarar 2010. Ya zuwa wancan lokaci, yawan Musulmai zai kai kashi 1 cikin 3 na yawan al'ummar duniya.

Kididdigar ta kuma nuna cewa, yanzu, kashi 1 cikin 3 na Musulmai a duniya suna zama a yankin Gabas ta Tsakiya da nahiyar Afrika, kuma wadannan yankunan ne da ake samun karuwar yawan al'umma mafiya yawa, kuma yankuna ne da ake samun karuwar Musulmai mafi yawa a duniya.(Bako)