Rahotannin baya bayan nan na cewa kungiyar Boko Haram, ta saki wasu mata da kananan yara su 158, wadanda ta yi garkuwa da su daga kauyen Katarko na jihar Yobe dake Arewa maso Gabashin Najeriya.

Da yake tabbatar da aukuwar wannan lamari, kwamishinan ma'aikatar shari'ar jihar ta Yobe Ahmed Goniri, ya ce an saki mutanen ne bayan sun shafe makwanni 3 a tsare. Goniri ya ce tuni wasu daga wadannan mutane da suka samu kubuta suka sadu da 'yan uwansu.

Kwamishinan shari'ar, wanda kuma ke jagorantar kwamitin lura da wadanda rikicin Boko Haram ya ritsa da su, ya kara da ce gwamnatin jihar na tantance matsayin wadannan mutane, ya yin da a hannu guda ake samar musu da tallafin kula da lafiya domin su samu nutsuwa.