Bangarori uku masu ruwa da tsaki kan matsalar kasar Ukraine, wadanda suka hada da Ukraine da kungiyar kula da harkokin tsaro da hadin gwiwa ta Turai(OSCE) da Rasha, sun cimma wata muhimmiyar yarjejeniya a ranar 10 ga wata dangane da wasu manyan batutuwa da dama.

A ranar, bangarorin uku sun gudanar da shawarwari cikin sirri a birnin Minsk, inda suka cimma wasu muhimman yarjejeniyoyi dangane da yadda sassa masu rikici da juna a gabashin Ukraine za su janye manyan makamansu, da tsarin da za a bi wajen tsagaita bude wuta, da kuma yadda za a sa ido a kan tsagaita bude wutan. Har wa yau, a labarin da kamfanin dillancin labarai na kasar Belarus ya bayar, an ce mahalarta taron sun kuma tattauna matsayin gabashin Ukraine da kuma batun gudanar da zabe a wurin.(Lubabatu)