Shirin wanda ya kunshi amfani da wasannin kwaikwayo wajen ilmantar da al'ummar kasar alfanun dake tattare da karbar katin zaben, zai game rassan hukumar ta NCAC dake daukacin jihohin kasar.
Da yake karin haske game da hakan, yayin taron karawa juna sani na hadin gwiwar hukumonin biyu, wanda ya gudana a birnin Abuja, kwamishina mai lura da harkar raba katunan zabe Dr. Chris O. Iyimoga, ya ce INEC ta yi amanna da tasirin wannan tsari a fannin yada bayanai, da wayar da kan jama'a game da muhimmancin gudanar zabe lami-lafiya, baya ga kasancewar hakan wata hanya ta yada al'adun al'ummar kasar.
A nata tsokaci kuwa, babbar darakta a hukumar NCAC, uwargida Dayo Keshi, cewa ta yi hukumarta za ta bi hanyoyin duk da suka wajaba, domin tabbatar da nasarar wannan hadin gwiwa, ta na mai cewa NCACn ta shirya tsaf, domin tabbatar da bada gudummawa, wajen ganin an gudanar da babban zaben Najeriyar cikin kyakkyawan yanayi.
