Kakakin rundunar 'yan sandan kasar Uganda Fred Enanga ya ce rundunar ta samu nasarar dakile wani harin ta'addanci da wasu mahara suka shirya kaddamarwa a Kampala fadar gwamnatin kasar.

Enanga wanda ya tabbatarwa kamfanin dillancin labarun kasar Sin hakan ta wayar tarho, ya kara da cewa jami'an tsaron sun kuma cafke wasu wadanda ake zargi da hannu, cikin shirya wannan ta'asa a jiya Asabar.

Tun da fari dai ofishin jakadancin kasar Amurka dake kasar ta Uganda ya fidda wata sanarwa kan shafin sa na yanar gizo, wadda ke gargadin Amurkawan dake kasar da su kauracewa zirga-zirga, su kuma tabbatar sun kasance a wuraren dake da cikakken tsaro.