Babban magatakardar MDD Ban Ki-Moon ya bayyana bakin cikinsa, game da aukuwar girgizar kasar nan da ta fadawa yankin kudu maso yammacin kasar Sin, wadda ta hallaka mutane da dama tare da lalata gine-gine masu yawa.

Cikin wata sanarwar da kakakinsa ya fitar, Mr. Ban ya mika sakon ta'aziyyarsa ga gwamnatin kasar Sin, da kuma iyalan wadanda bala'in ya rutsa da su, yana mai fatan wadanda suka jikkata za su murmure cikin sauri.

Ya ce MDD a shirye take ta tallafi duk wani shiri na bada tallafin jin kai, da samar da taimakon kasa da kasa a duk lokacin da bukatar hakan ta bijiro. (Saminu Hassan)