Shugabar kwamitin kungiyar tarayyar Afrika AU, madam Nkosazana Dlamini Zuma ta yi allawadai da harin ta'addancin da aka kai a ranar Alhamis wanda ya yi sanadiyyar mutuwar mutane 39 tare da jikkata mutane da dama a yankin jihar Xinjiang ta Ouigoure mai cin gashin kanta dake arewa maso yammacin kasar Sin, in ji kungiyar AU a cikin wata sanarwar da ta fitar a ranar Jumma'a.

Madam Dlamini Zuma ta yi kira ga gamayyar kasa da kasa da ta dauki matakai cikin hadin kai domin yaki da hare-haren ta'addanci dake karuwa a duniya, da kuma tashi tsaye wajen kawar da wannan annoba a cikin sanarwar, haka kuma jami'ar ta tunatar da cewa barazanar ta'addanci da masu kaifin kishin addini, na janyo ma duniya babbar matsala, hakan na nuna cewa ya zama dole a ci gaba da samun hadin kasa da kasa daga dukkan fannoni domin karfafa karfin yaki da wannan bala'i a duniya baki daya. (Maman Ada)