0222murtala

Gwamnatin jihar Sokoto dake arewacin Najeriya, ta bayyana cewa za ta kashe naira miliyan 120, don sayo babura masu tayoyi 3 har guda 300, domin rabawa matasan jihar marasa aikin yi.

Kwamishinan yada labaran jihar, Alhaji Danladi Bako ne ya bayyana hakan ga kamfanin dillancin labarai na kasar a Sokoto, inda ya ce yunkurin wani bangare ne na kokarin gwamnatin jihar, na samar da guraben ayyukan yi ga matasan jihar.

Alhaji Danladi Bako ya ce za'a raba baburan ne ga matasa, dake kananan hukumomin jihar 23, a cikin farashi mai rahusa.

Sa'annan ya ce yunkurin zai taimaka wajen rage adadin yawan matasa masu zaman kashe wando a jihar. (Murtala)