130207-aladar-sinawa-ta-kirga-shekaru-da-dabbobi-lubabatu

Sinawa na da wata al'adar gargajiya ta kirga shekaru da dabbobi. Dabbobi 12 ne ake amfani da su, wato su ne bera, saniya, damisa, zomo, dragon, maciji, doki, tunkiya, biri, kaji, kare da kuma alade, kuma ana zagaya duk dabbobin a shekaru 12, 12. Ana kuma yin amfani da wadannan dabbobi wajen alamanta shekarar haihuwa. Wannan sabuwar shekara da aka shiga a ranar 31 ga watan Janairu bisa kalandar gargajiya ta Sinawa ita ce shekarar doki. Don haka, wanda aka haife shi a wannan shekara ta doki, doki ne zai alamanta shekararsa ta haihuwa.

Tun tuni a karni na 6 kafin haihuwar Annabi Isa Alaihisalam, Sinawa sun fara yin amfani da dabbobi 12 wajen kirga shekaru, kuma ya zuwa karni na 5 zuwa na 6, al'adar ta riga ta zama ruwan dare. Bayan kirga shekaru, kakan kakanin Sinawa sun kuma yi amfani da dabbobin 12 wajen kirga watanni da kuma lokuta na kowace rana.

Game da me ya sa kakanin kakanin Sinawa suka fara kirga shekaru da sunayen dabbobi, dalili shi ne sabo da ilmin da suka samu game da taurari. A zamanin da, kakanin kakanin Sinawa sun gano cewa, lokacin zafi da lokacin hunturu suna canzawa, kuma wata ya kan cika har sau 12 cikin shekara guda, sabo da haka, sun tsai da dabbobi 12 wajen kirga shekaru. Kuma sun sanya su cikin wani jeri, inda suka jera bera, saniya, damisa da sauran dabbobi a ciki.