Kakakin ma'aikatar harkokin wajen Uganda Mista Fred Opolot ya bayyana a ran 18 ga wata cewa, gwamnatin kasar Uganda ta rufe ofishin jakadancinta da ke birnin Juba, babban birnin kasar Sudan ta Kudu, sakamakon rikicin da ake samu a makwabciyarta. Uganda ta dauki wannan mataki har sai kura ta lafa a wannan kasa kafin ta sake bude ofishin jakadancinta. A halin yanzu, ma'aikatan ofishin jakadancinta dake kasar ta Sudan ta kudu suna zaman jiran umurni daga gwamnatin kasarsu, idan kuma halin da ake ciki a wannan kasa ya kara tsanacewa, gwamnatin Uganda za ta bukaci jama'arta da su janye daga Sudan ta Kudu ba tare da bata lokaci ba.(Danladi)