Kamfanin dillancin labaru na kasar Sin Xinhua ya samo mana labarin cewa kasar Iran ta kaddamar da wani katafaren cibiya na sarrafa wani sinadarin Yellowcake a Turance wanda zai samar da garin uranium mai kauri da zai samar da wani daman na samar da man uranium domin makaman nukiliya.

Wannan cibiyar dai mai suna Shahid Rezaeenejad da aka kaddamar a ranar Talatan nan 9 ga wata a tsakiyar garin Ardakan a gundumar Yazd, kuma gidan talabijin din kasar suka nuna kai tsaye, Shugaban kasar Mahmoud Ahmadinijad ya halarci bikin abin da ya zo daidai da ranar kasar na fasahar makaman nukiliya.

A jawabinsa Shugaba Ahmadinajad ya ce kasar ta samu ci gaba sosai duk da hassadar makiya ta bangaren siyasa da kuma takunkumin da ake ta saka mata.

A ranar Talatan ne kasar dake karkashin addinin Islama ta kuma kaddamar da wani cibiyar a Saghand shi ma na sarrafa sinadarin uranium din duka a gundumar Yazd wanda ake sa ran zai iya hako sinadarin daga nisan mita 350 daga karkashin kasa.

Mahukuntar kamfanin dillancin labarai na kasar IRNA sun bada rahoto a jiya Litinin cewa sinadarin uranium din da aka hako za'a sarrafa shi zuwa garin Yellowcake wato garin uranium mai kauri a cibiyar Shahid Rezaeenejad. (Fatimah)