Tun bayan da Faransa ta dauki matakan soja a kasar Mali a watan Janairu na bana, baki daya an tura hafsoshi da sojoji dubu 4 zuwa kasar Mali. Ya zuwa watan Maris kuma, an mai da martani sosai ga sojojin Faransa dake arewacin kasar Mali. Hakan ya sa yawan mutuwar sojojin Faransa ya karu. Ya zuwa ranar Laraba ta wannan mako, an riga an tabbatar da mutuwar sojojin Faransa hudu. Shugaban kasar Faransa ya canza lokacin janye sojojin daga Mali daga watan Maris zuwa na Afrilu.

Bisa sanarwar da fadar shugaban kasar Faransa ta bayar, an ce, a safiyar ranar 6 ga wata, wani sojan Faransa ya mutu a cikin aikin sojan da aka dauka a gabashin kasar Mali. A sabili da haka, yawan mutuwar sojojin Faransa ya karu zuwa hudu.

A ranar Alhamis 7 ga wata, ministan tsaron kasar Faransa ya kai ziyara a Mali ba zato ba tsammani, domin karawa sojojin kasar kwarin gwiwa, inda ya bayyana ra'ayin kasar Faransa na taimakawa jama'a da kasar Mali wajen mayar da ikon mulkin kasar, tare da yin shelar cewa, ayyukan rundunar sojan Faransa za su kammala yadda ya kamata.

A sa'i daya kuma, shugaban kasar Faransa, Francois Hollande ya bayyana cewa, za a janye sojojin Faransa daga watan Afrilu na bana, a maimakon watan Maris.

Wani masanin aikin soja na Faransa ya yi nazarin cewa, watakila za a sake tsawaita wa'adin aikin soja da Faransa ke yi a kasar Mali, har ma zuwa watan Yuli, sabo da babu wata masaniya kan hakikanin yawan dakaru masu tsattsauran ra'ayi na kungiyar Musulmi.(Fatima)