Mujallar Forbes ta gabatar da jerin sunayen mutane mafi arziki na duniya na shekarar 2013 a ranar 4 ga wata, kuma shugaban kamfanin sadarwa na kasar Mexico Carlos Slim Helu ya rike da matsayin farko a duniya, wanda yake da kudi dala biliyan 73, kuma shi ne na farko wanda ya rike wannan matsayi a shekaru hudu a jere. Kana shugaban kamfanin samar da siminti na kasar Nijeriya Aliko Dangote ya ci gaba da zama mutum mafi arziki a nahiyar Afirka a cikin shekaru uku jere, wanda yake da kudi dala biliyan 16.1, kana matsayinsa a duniya ya daga daga 76 a bara zuwa 43 a bana.

Aliko Dangote yana da shekaru 56 da haihuwa, kuma ya kafa kamfaninsa mai suna "Dangote Group" a birnin Lagos dake kasar Nijeriya a lokacin da yake da shekaru 23. A shekarar 1999, Dangote ya kai ziyara a kasar Brazil, inda ya samu wani sabon tunani daga bunkasuwar sha'anin kera kayayyaki a kasar Brazil. Domin yawancin kayayyakin da ake saya a kasar Nijeriya suna fitowa ne daga kasashen waje, Dangote ya fara gudanar da harkokinsa da cinikayya a fannonin samar da siminti, hoda, sukari, gishiri da kuma shayi da abinci. A halin yanzu kuma, harkokinsa na shafar mashigin teku, gidaje, sadarwa, man fetur, iskar gas, karfe da dai sauransu, kuma ana amfani da simintinsa a dukkan nahiyar Afirka. (Zainab)