Za a kira taron shugabannin kasashen BRICS karo na biyar a kasar Afirka ta Kudu a karshen watan Maris. Kuma ana zaton kasashen biyar, za su sanar da kafuwar bankin na BRICS yayin wannan taron. Don gane haka, ran 5 ga wata, mataimakin shugaban bankin duniya, kuma babban masanin tattalin arziki Kaushik Basu, ya bayyana a kasar Afirka ta Kudu cewa, a halin yanzu, hakika ana bukatar kafuwar bankin kasashen BRICS, ko da kuwa hakan zai janyo fuskantar ayyuka masu wuyar gaske.

Haka zalika, a halin yanzu, akwai rahotanni dake nuna cewa, kasashen biyar na BRICS sun riga sun cimma ra'ayi guda, kan samar da dallar Amurka biliyan 50 cikin hadin gwiwa don kafuwar bankin, kuma za su ci gaba da yin shawarwari kan yadda za a gudanar da ayyukan shirye-shirye, dangane da kafuwar bankin a yayin taron da za su yi a Afirka ta Kudu.

Bisa shirin da aka tsara, bankin kasashen na BRICS ba kawai zai ba da taimako wajen taruwar kudade don gina ababen more rayuwa a wadannan kasashen biyar ba ne kawai, domin kuwa ana fatan zai ba da damar zuba jari ga sauran yankunan kasa da kasa, musamman ma wadanda ke nahiyar Afirka. (Maryam)