A cikin rahoton da aka gabatar a ranar 5 ga wata a gun taron farko na majalisar wakilan jama'ar kasar Sin karo na 12 game da shirin kasafin kudi na gwamnatin kasa da kananan hukumomin kasar, an ce, yawan kasafin kudin da kwamitin tsakiya na kasar Sin ta tsara a fannin tsaron kasa ya kai Yuan biliyan 720.168, wanda ya karu da kashi 10.7 cikin kashi dari bisa na shekarar bara.

A ganin wakilai daga bangaren soja masu halartar taron, kara yawan kudin da za a kashe a fannin tsaron kasa zai tabbatar da cimma burin sojojin 'yantar da jama'ar kasar Sin na samun nasara a yaki. Yawan kudin da aka kashe a fannin tsaron kasa bai taka kara ya karya ba idan aka kwatanta da yawan kudin da aka kashe domin raya tattalin arziki. Wakilin majalisar wakilan jama'ar kasar Sin kuma manazarci a kwalejin kimiyyar aikin soja na kasar Chen Zhou ya bayyana cewa, ana kokari domin yawan kudin da za a kashe a fannin tsaron kasa ya dace da matakin bunkasuwar tattalin arzikin kasar.

Mataimakin shugaban kwalejin nazarin ilmin aikin soja kuma memban majalisar bada shawara kan harkokin siyasa ta kasar Sin Liu Jian ya bayyana a ranar 5 ga wata cewa, yawan kudin da aka kashe a fannin nazarin fasahohin tsaron kasa kashi daya ne cikin kashi arba'in kawai bisa na kasar Amurka. Ya ce, akwai gibi sosai a tsakanin Sin da sauran manyan kasashen duniya a bangaren kayayyakin aikin soja. (Zainab)