Wasu da suka sheda abkuwar lamarin suka ce, dakarun kabilar Rizeigat da dama ne suka kai hari ga garin Al-Siraif dake jihar arewacin Darfur a ranar 23 ga wata, burinsu kuwa shi ne kai hari ga kabilar Barney Hussein. Dakarun dai sun yi amfani da manyan makamai kan kabilar da suke adawa da ita. Bisa kididdigar da aka yi, an ce, mutane 53 na kabilar Barney Hussein ne suka mutu a sakamakon harin, ciki har da kananan yara 5 da mata 7. Kana mutane 83 suka samu raunuka, sa'an nan kuma aka sace tumaki fiye da dubu 40 da shanu fiye da dubu 2.
Tun daga farkon watan Janairun bana ne dai, aka fara samun rikice-rikice masu yawa tsakanin kabilar ta Rizeigat da ta Barney Hussein a garin na Al-Siraif bisa dalilan mallakar wani ma'adinin zinari, wadanda hakan ya haddasa mutuwar mutane fiye da 100, baya ga mutane dubu 130 da suka rasa gidajensu. (Zainab)
