A ranar Laraba 5 ga wata, shugaban tawagar kasar Sin dake halartar babban taron yanayi na MDD a birnin Doha, kana mataimakin darektan kwamitin bunkasuwa da yin kwaskwarima na kasar Sin, Xie Zhenhua, ya furta cewa, Sin za ta tsaya tsayin daka kan bin manufar yin tsimin makamashi da kiyaye muhalli, da sa kaimi ga canza hanyar samun bunkasuwa da ta rayuwa, da kokarta sa kaimi ga neman samun bunkasuwa tare da rage fitar da yawan gurbatacciyar iska, a kokarin sa kaimi ga kyautata tsarin tattalin arziki, da na masana'antu, da na makamashi, ta yadda za a cimma burin yin tsimin makamashi da rage fitar da gurbatacciyar iska da aka tsara. Dadin dadawa, Xie ya yi kira ga kasa da kasa da su bi tsarin daukar nauyi iri daya yayin da ake amincewa da bambancinsa, domin tabbatar da yarjejeniyar sauyawar yanayi ta MDD (UNFCCC).

Baya da haka kuma, Xie Zhenhua ya gabatar da ra'ayoyi hudu dangane da babban taron Doha, wato tsayawa tsayin daka kan bin tsare-tsare, da daukar babban nauyi a kokarin tabbatar da yarjejeniyar Bali, da cika alkawali a kokarin karfafa hadin gwiwa da amincewa da juna, da kuma samar da makoma mai kyau ta hanyar aiwatar da yarjejeniya yadda ya kamata.

A wannan rana kuma, an gudanar da dandalin tattaunawa kan cinikayyar carbon da bunkasa tattalin arziki mai tsimin makamashi na kasar Sin a rumfar kasar Sin a wannan taro na kasar Qatar, inda Xie Zhenhua ya gabatar da yanayin da ake ciki a kasuwannin carbon na Sin. Ya ce, za a yi kokari sosai wajen cimma burin yin tsimin makamashi da rage fitar da yawan gurbatacciyar iska. A kokarin cimma wannan buri, kuma a lokaci shirin samun ci gaba na tsawon shekaru 5 na 11, kasar Sin ta riga ta zuba jari sama da yuan biliyan 1000 a wannan fanni. Idan kuma ana fatan cimma shirin na 12 na shekaru 5, za a zuba jari sama da yuan biliyan 2000, yayin da zaman al'ummar kasar zai zuba kudi sama da yuan biliyan 4000. A sabili da haka, dole ne mu yi kokarin cimma burin, tare da rage yawan kudin da za a kashe. Shi ya sa mun yi amfani da wannan tsari na cinikayyar carbon.(Fatima)