Ranar 1 ga watan Disamba ta kasance ranar yaki da cutar kanjamau a duniya ta 25. A shekaru 10 da suka wuce, kasashen duniya sun samu babban ci gaba na kokarin shawo kan bazuwar kwayar HIV, kamar yadda hukumar kiwon lafiya ta duniya WHO ta bayyana cewa, a shekarar 2011, an kara samun mutane miliyan 2.5 masu dauke da kwayoyin cutar kanjamau, kana sauran kimanin miliyan 1.7 suka mutu a shekara ta 2011 sakamakon wannan cutar. Sai dai idan an kwatanta da yawan jama'ar da suka kamu da cutar a shekaru 10 da suka wuce, za a ga jimillar ta ragu da dubu 700, sa'an nan idan an kwatanta da jimillar shekarar 2005, yawan mutuwar jama'a ya ragu da dubu 600.

Babban taken ranar yaki da cutar kanjamau ta shekarar 2012 shi ne 'tabbatar da samun sifiri, wato babu wanda ya fara kamuwa da cutar kanjamau, babu mutanen da suka mutu sakamakon cutar, kuma babu nuna bambanci.' Ta la'akari da yadda cutar take bazuwa a duniya, za a ga zai yi wuya sosai wajen cimma burin 'tabbatar da samun sifiri', amma kasashen duniya na kokarin samun ci gaba a wannan fanni.

A babban taron MDD da ya gudana a shekarar 2011, gwamnatocin kasashe daban daban sun yarda da sanya buri na 'baiwa masu dauke da cutar kanjamau miliyan 15 na duniya maganin da zai ceto rayukansu a shekarar 2015'. Game da batun, jami'an hukumar WHO sun ce, bisa kididdigar da aka yi, an yi hasashen cewa, idan kasashe daban daban za su iya ci gaba da kokarin da suke a halin yanzu, to, za a iya cimma burin da aka sanya gaba. (Bello Wang)