A ran 6 ga wata, ministan harkokin wajen gwamnatin wucin gadi ta kasar Madagascar Pierrot Rajaonarivelo ya bayyana cewa, tun daga lokacin da kasashen biyu suka kafa huldar diplomasiya, ya zuwa yanzu, wato tsawon shekaru 40 da suka wuce, kasashen Sin da Madagascar sun yi hadin gwiwa a fannonin da suka shafi aikin noma, ilmantarwa, likitanci, makamashi da ayyukan gine-gine da dai sauransu, kuma kasar Madagascar na son cigaba da yin hadin gwiwa da Sin a fannoni daban daban, musamman ma a fannin aikin noma.

Mr. Pierrot Rajaonarivelo ya fadi hakan ne, a wajen liyafar taya murnar cika shekaru 40 da kafa dangantakar diplomasiya tsakanin kasar Sin da kasa ta Madagascar, da aka gudanar a ofishin jakadancin Sin da ke Madagascar, kuma ya nuna godiyarsa ga taimakon da Sin ta bai wa kasar Madagascar a cikin shekaru 40 da suka gabata.

Jakadan Sin da ke kasar Madagascar Shen Yongxiang ya bayyana cewa, tun lokacin da aka kafa dangantakar diplomasiya, ya zuwa yanzu, a cikin shekaru 40 da suka gabata, dangantakar kasashen biyu ta cigaba da bunkasa cikin hali mai karko, bugu da kari, kasashen biyu, na nuna fahimtar juna da kuma goyon baya a dukkan harkokin kasa da kasa da na shiyya shiyya, tare kuma da kiyaye moriyar kasashe masu tasowa, yayin da suke gudanar da hadin gwiwa mai amfani a fannonin tattalin arzikin da cinikayya, ayyukan ba da ilimi, da kuma zaman lafiya da dai sauransu. A cikin shekaru 3 masu zuwa, kasar Sin za ta kara karfafa hadin gwiwa da kasar Madagascar a fannonin ayyukan ba da ilmi da ba da horo ga kwararru. (Maryam)