A ranar Laraba 24 ga wata kasar Sin ta fidda sanarwa mai kunshe da manufofinta dangane da makamashi ta shekarar da muke ciki, takar dai na kunshe ne da bayanin kudurorin kasar a fagen samarwa, killacewa da kuma habaka amfani da tsaftataccen makamashi, kuma ofishin yada labarun majalisar zartaswar fadar gwamnatin kasar ne dai ya fidda wannan sanarwa.

Bisa kididdiga dai wannan sanarwa ta ce, yawan makamashi da kasar ta Sin ke amfani da shi na karuwa da kaso 5.82 a kowace shekara, tun daga shekarar 1981 ya zuwa bara, al'amarin dake nuni ga karfafar tattalin arzikin kasar da kaso 10 bisa dari a kowace shekara.

Har ila yau, sanarwar tace Sin ta gina kyakkyawan tsarin samar da makamashin Kwal, da lantarki, da na albarkatun man-fetur, baya ga makamashin iskar Gas da ragowar nau'oin makamashi mai tsafta. Wannan tsari a cewar sanarwar ya kawo sauyi mai nagarta, a fagen bunkasar amfanin da al'umma ke yi da nau'o'in makamashi daban-daban, tun daga lokacin da kasar ta zartas da sabbin manufofin ta, ciki hadda bude kofarta a karshen shekarar 1970. (Saminu Alhassan Usman)