A ranar 15 ga wata, Jam'iyyar EPRDF da ke kan karagar mulkin kasar Habasha ta zartas da wani kuduri, inda aka zabi Hailemariam Desalegn, mataimakin firaministan kasar Habasha kuma ministan harkokin waje na kasar da ya zama shugaban jam'iyyar, hakan ya sheda cewa, Mr. Hailemariam zai hau mukamin firaministan kasar Habasha a hukunce.

Haka kuma ministan watsa labaru na kasar Habasha Bereket Simon ya bayyana a yayin wani taron manema labaru da aka shirya a wannan rana, cewar an zabi Demeke Mekonnen, ministan ilmi na kasar da ya zama mataimakin shugaban jam'iyyar a yayin taron jam'iyyar na kwanaki biyu.

Mr. Bereket ya kara da cewa, sabon shugaban Jam'iyyar EPRDF da kuma mataimakinsa za su fara aikinsu a matsayin firaministan kasar Habasha da mataimakinsa, kuma bayan da aka samu amincewa daga majalisar dokokin kasar, Mr. Hailemariam da Mr. Demeke za su yi rantsuwar kama aiki a farkon watan Oktoba na bana.

Tsohon firaministan kasar Habasha Meles Zenawi mai shekaru 57 da haihuwa, ya riga mu gidan gaskiya a ranar 21 ga wata Agusta a birnin Brussels, babban birnin kasar Belgium, wanda ya tsaya kan karagar mulkin kasar har na tsawon shekaru 21. Bayan rasuwarsa, nan da nan an nada mataimakinsa Mr. Hailemariam a matsayin mukadashin firaminista kamar yadda kundin tsarin mulkin kasar ya tanada.(Kande Gao)