A ranar 9 ga wata, shugaban kasar Sin Hu Jintao ya yi shawarwari tare da faramanistan kasar Japan Noda Kahiko a yayin kwarya-kwaryar taron koli karo na 20 na kungiyar hadin gwiwa a tsakanin kasashen Asiya da na tekun Pacific ta fuskar tattalin arziki wato APEC da aka shirya a kasar Rasha, inda shugaba Hu Jintao ya bayyana matsayin kasar Sin kan dangantakar da ke tsakanin kasar Sin da kasar Japan a halin yanzu da kuma batun tsibirin DiaoYu.

Shugaba Hu ya nuna cewa, a cikin 'yan kwanakin nan, kasar Sin da kasar Japan na cikin wani hali mai tsanani sakamakon batun tsibirin DiaoYu. Ko da yaushe kasar Sin ba ta canja matsayinta kan batnn tsibirin Diaoyu ba. Haka kuma, Shugaba Hu ya jaddada cewa, ko wane matakin da Japan za ta dauka ta ko wace hanya wajen sayen tsibirin Diao Yu haram ne kuma maras amfani, kasar Sin ba za ta yarda da wannan manufa ko kadan ba. Gwamnatin kasar Sin tana tsayawa tsayin daka kan kiyaye ikon mallakar yankunan kasarta. Dole ne kasar Japan ta fahimci tsananin yanayin da ake ciki yanzu, da daina aikata kuskure. Ya kamata ta yi kokari tare da kasar Sin domin ciyar da dangantaka a tsakaninsu zuwa gaba.(Maryam)