Kungiyar APEC dai tana kunshe da mambobin kasashe 21 ciki har da Sin, Amurka, Rasha da Japan, kuma ta kasance dandalin tattalin arziki mafi muhimmanci a wannan yanki, wanda yawan GDP na mambobin kasashen ya kai kashi 56 bisa dari da dukkan duniya ke samu, kuma yawan kudin da ta samu a fannin ciniki ya kai kashi 48 cikin dari bisa na duk duniya.
A gun taron mai taken "Hadin kai da samun bunkasuwa, da yin kagowa domin samun wadata", za a tattauna kan batun yin ciniki da zuba jari cikin 'yanci da raya yankin bai daya, kara tabbatar da batun samun isashen hatsi, kara yin hadin gwiwa da sauransu.
Bisa labarin da aka bayar, an ce, Shugaba Hu Jintao zai bayyana matsayin da Sin ta dauka a gun wannan taron kan batun sa kaimi ga bunkasuwar tattalin arzikin yankin Asiya-Pacific, da kuma matsayin da Sin ta dauka kan wasu muhimman batutuwan da za a tattauna a gun taron kungiyar APEC na wannan shekara, tare da waiwayen sakamakon da APEC ta samu cikin shekaru 20 da suka gabata da hange nesa kan makomar APEC.
A yayin ziyararsa, Shugaba Hu Jintao zai gana da shugabannin mambobin kasashen kungiyar ciki har da shugaban kasar Rasha Władimir Putin.(Amina)
