A ranar 2 ga wata, yayin da kakakin ma'aikatar tsaron kasar Sin, Geng Yansheng ke zantawa da manema labaru game da takardar bayani kan harkokin tsaro ta shekarar 2012 da Japan ta fitar, ya ce, a ranar 31 ga watan Yuli, takardar da gwamnatin Japan ta fitar game da harkokin tsaron kai ta shekarar 2012, ta murde gaskiya da yin furfaganda game da kalubalen aikin soji na kasar Sin, kana ta yi zargi da bai da tushe balle makama game da harkokin tsaro da aikin soji na kasar Sin, tare da tsoma baki cikin aikin soji na kasar Sin, wato yin shisshigi game da harkokin cikin gida na kasar Sin, abin da ya sa kasar Sin take adawa da hakan, kuma tuni ta riga ta yi tattauna a hukunce da kasar Japan.

Kakakin ya ce, Sin ta nace ga bin hanyar zaman lafiya da samun bunkasuwa, da tsayawa kan manufar tsaro ta kare kanta, kuma dalilin da ya sa Sin ta inganta harkokin tsaro da karfin soji shi ne domin tabbatar da cin gashin kai da cikakken yankin kasar, da kiyaye tsaron kasar, ba wai domin wata kasa ba.

Geng Yansheng ya ce, a cikin 'yan shekarun nan, Japan ta inganta karfin soji, kuma ta kara jibge soji a tsibiran da ke yammaci da kudancin kasar, kuma an kawo halin kunci tsakaninta da sauran kasashen da ke makwabtaka da ita game da cikakken yankin kasar, kuma hakan ya jawo hankali da damuwa daga kasashen da ke Asiya da tekun Fasific da dama, kasar Sin tana fatan Japan za ta yi tuba game da manufar tsaro ta kasarta, da ci gaba da gudanar da matakan da za su kawo amincewar juna tsakaninta da kasashe makwabtaka, don tabbatar da zaman lafiya da kwanciyar hankali a yankin.(Bako)