Sakatare janar na MDD, Ban Ki-moon ya bayyana a ranar Asabar cewa ya tuntubi masu fada aji na shiyoyi da na kasa da kasa da yin aiki tare da mai shiga tsakani na MDD da kungiyar tarayyar kasashen larabawa, Kofi Annan domin neman wata mafitar warware rikicin kasar Sham cikin ruwan sanyi.

Mista Ban ya nuna damuwarsa kan halin da kasar Sham take ciki a yayin wani taron manema labarai bayan wata ganawarsa tare da shugaban kasar Croatia Ivo Josipovic a birnin Brijuni na kasar.

Sakatare janar na MDD ya tura wani jami'in MDD dake kula da ayyukan wanzar da zaman lafiya, Herve Ladsous a kasar Syria domin kimanta halin da ake ciki a wannan kasa.

A cewar Ban Ki-moon, matakin da kwamitin tsaro na MDD ya dauka na kara wa'adin aikin tawagar sa ido zuwa kwanaki 30 na da "manufa mai kyau"

Hakazalika shugaban majalisar dinkin duniya yayi kira ga bangarori daban daban na kasar Syria dasu "dakatar da tashe tashen hankali ba tare da wani sharadi ba". (Maman Ada)