Ministan kudi na kasar Sin Xie Xuren ya bayyana a ranar 6 ga wata a nan birnin Beijing cewa, a bana, yawan kudin da gwamnatin kasar Sin ta ware ta fannonin ilmi, kiwon lafiya, ba da kariya ga al'umma, gidaje masu rahusa da gwamnati ke samarwa domin talakawa, al'adu da dai sauran fannonin da suka shafi zaman rayuwar al'umma ya kai kudin Sin yuan biliyan 1380, wanda ya karu da kashi 19.8%.

Mr.Xie Xuren ya yi wannan furuci ne a yayin da yake halartar taron manema labarai da aka shirya dangane da babban taron majalisar wakilan jama'ar kasar Sin da a halin yanzu ake yi a nan birnin Beijing. Ya ce, a shekarar bana, za a kara ware kudi ta fannonin harkokin ba da ilmi, kuma za a yi kokarin ganin yawan kudin da aka zuba zai kai kashi 4% na GDP na kasar. Sa'an nan, za a gaggauta raya tsarin ba da kariya ga zaman al'umma, da inganta gyare-gyaren tsarin samar da magani da kiwon lafiya. Ban da haka, za a yi kokarin gina gidaje masu rahusa domin talakawa, tare kuma da bunkasa harkokin al'adu. (Lubabatu)