Ranar Alhamis din nan ne gidan rediyon kasar Zimbabwen ya ambato Florie Ramogodi, jami'ar kula da ayyukan musamman ta hukumar FIFA tana cewar, al'amarin na yini hudu da hukumar kwallon kafa ta kasar Zimbabwe ZIFA, ta shirya kuma ya samu tallafin kudi daga hukumar FIFA, zai gudana ne a Harare babban birnin kasar daga ran daya zuwa ta hudu ga watan Nuwamban.
Hukumar kwallon kafa ta duniyar, zata yi kokarin fadakarwa ne kan yadda za'a samar da alfanu daga harkokin wasannin 'yan mata.
Ramogodi wadda ta fito daga ofishin bunkasa harkokin wasanni na FIFA dake birnin Gabrone na kasar Botswana, ta gana da jami'an hukumar ZIFA, da sauran wadanda harkar ta shafa don duba yadda Zimbabwe ta kai wajen samar da kayayyakin da ake bukata don gudanar da wannan gagarumin taro.
Taron bitar zai samu halartar masu gabatar da takardu daga kungiyoyin FIFA na cikin kasar da kuma kafofin yada labarai. Inda za'a duba yanayin bunkasar kwallon kafar mata, da matsayin da take ciki, irin alfanun da zata iya samarwa da dai makamantan hakan. (Garba)
