Ran 3 ga wata, agogon kasar Afirka ta Kudu, an yi wasan tsakiya na kusa da na karshe a gasar cin kofin duniya ta wasan kwallon kafa, inda kasar Jamus ta lallasa kasar Argentina da ci hudu da nema, sa'an nan kasar Spaniya ta doke kasar Paraguay da ci daya mai ban haushi, ta haka Jamus da Spaniya za su kara da juna a wasan kusa da na karshe da za a yi a ran 7 ga wata, agogon wurin.

A karawar da ya gudana a tsakanin Jamus da Argentina, a minti 3 da fara wasan, Thomas Muller na Jamus ya samu nasarar fara jefa kwallo a ragar Argentina. Ko da yake 'yan wasan Argentina sun yi ta kai hari, amma ba su iya zura kwallo a ragar Jamus ba. Duk da haka, bayan an dawo hutun rabin lokaci, Miroslav Klose na Jamus ya sa kwallaye 2 a ragar Argentina, wanda karo na 100 ne ya wakilci Jamus domin shiga gasannin duniya. Haka kuma, Arne Friedrich na Jamus shi ma ya sanya kwallo a ragar Argentina.

Bayan karawar, Klose ya buga kwallaye 14 a gasar cin kofin duniya, wato ke nan yawan kwallayen ya yi daidai da yawan kwallayen da wani mai kai hari na daban na Jamus Gerhard Muller ya buga a gasar, sa'an nan, ya zama na biyu a tarihin gasar bayan Ronaldo na kasar Brazil, wanda ya buga kwallaye 15 gaba daya.

Har wa yau, a wata karawa ta daban da aka yi a tsakanin Spaniya da Paraguay, David Villa na Spaniya shi ne ya zura kwallo a ragar Paraguay, wadda hakan ya taimaka wa Spaniya a karo na farko ta shiga wasan kusa da na karshe a gasar cin kofin duniya. Haka zalika, bisa kwallaye 5 da ya jefa, David Villa ya zama na farko a gasar cin kofin duniya ta Afirka ta Kudu. (Tasallah)