Yau 26 ga wata, a nan Beijing, Lan Zhiqi, mataimakin shugabar sashen yayata al'adu na kwamitin kula da harkokin kabilu na kasar Sin ya bayyana cewa, ya zama dole kasar Sin ta inganta rawar da yanar gizo ta Internet da sauran sabbin nau'o'in kafofin yada labaru ke takawa wajen yayata da bayananun al'adun kananan kabilu daga zuriya zuwa wata zuriya, a kokarin biyan bukatun kabilu daban daban da kuma sa kaimi kan yin mu'amala da fahimtar juna a tsakaninsu ta fuskar al'adu.

Mr. Lan ya fadi haka ne a yayin da yake halartar bikin bude taron dandalin tattaunawar karo na 2 kan sabbin nau'o'in kafofin yada labaru da yayata al'adun kabilu. Lan ya kuma kara da cewa, sabbin nau'o'in kafofin yada labaru, kamar yanar gizo na iya yayata al'adun kananan kabilu cikin sauri da sauki kuma ba tare da samun matsalar lokaci ba. Nan gaba wajibi ne kasar Sin ta sa kaimi kan yin amfani da sabbin nau'o'in kafofin yada labaru cikin harsunan kananan kabilu, da zummar yayata al'adunsu yadda ya kamata, ta yadda za su iya cin gajiyar bunkasuwar fasahar sabbin nau'o'in kafofin yada labaru. (Tasallah)