Bisa labarin da ma'aikatar harkokin waje ta kasar Sin ta bayar a daren ranar 24 ga wata, an ce, an samu nasarori a fannoni 14 a tsakanin Sin da Canada yayin da shugaban kasar Sin Hu Jintao yake ziyara a kasar Canada, ciki har da sabon burin kara yawan kudin da aka samu daga ciniki a tsakanin kasashen biyu bayan shekaru 5, da wata yarjejeniyar da kamfanin samar da man fetur da iskar gas na kasar Sin da kamfanin makamashi na kasar Canada suka daddale da dai sauransu.

Yayin da Hu Jintao yake ziyara a kasar Canada, bangarorin biyu sun jaddada batun inganta dangantakar abokantaka a tsakaninsu, kana sun sanar da cewa, za a daga yawan kudin da ake samu daga ciniki a tsakanin kasashen biyu zuwa dala biliyan 60 a shekarar 2015, da kuma kafa cibiyar al'adun kasar Sin a kasar Canada.

Ban da wannan, yarjeniyoyin da gwamnatocin kasashen biyu suka daddale sun hada da kafa rukunin kiyaye muhalli a karkashin kwamitin hadin gwiwa na kasashen biyu a fannin tattalin arziki da cinikayya, da kuma mai da tawagar yawon shakatawa ta kasar Sin ta kara samun sauki wajen yin yawon shakatawa a kasar Canada da dai sauransu.(Zainab)