Ranar 3 ga wata ta kasance ranar ban girma ga tarayyar Afirka a gun bikin baje kolin duniya da ake yi a Shanghai. A gun bikin da aka yi domin murnar ranar, Zhou Hanmin, mataimakin shugaban kwamitin zartaswa na bikin baje kolin, ya yi jawabin cewa, tarayyar Afirka ta halarci bikin ne bisa jigon "babban tasirin da makamashi mai tsabta ke yi ga kula da biranen Afirka", abin da ya bayyana kulawar da ake yi da muhallin zama na bil Adam da kuma tunanin da ake yi kan ci gaban birane.

Elisabeth Tankeu, wakiliyar kula da harkokin ciniki da masana'antu ta kwamitin tarayyar Afirka, ta ce, biranen Afirka na bunkasa cikin sauri, ba za a iya daidaita matsalar gibin da ke tsakanin masu arziki da matalauta da kuma rashin kwanciyar hankalin al'umma ba, illa sai an kula da biranen yadda ya kamata, ta ce,"Muna sa ran kwamitin tarayyar Afirka da mambobin tarayyar Afirka za su samu wata sabuwar hanyar tabbatar da zaman lafiya da tsaro bisa ga halartar bikin baje kolin duniya da ake yi a Shanghai." (Lubabatu)