Ranar 15 ga wata, bayan da ya halarci zaman taro a mataki na biyu na kwarya-kwaryan taro a karo na 17 tsakanin shugabanni kasashe membobin kungiyar hadin-gwiwa ta fannin tattalin arziki ta kasashen Asiya da yankin Pacific wato APEC, shugaban kasar Sin Mista Hu Jintao ya tashi daga kasar Singapore domin komowa gida.

Shugaba Hu Jintao ya soma ziyararsa ne tun daga ranar 10 ga wata. Tuni, a karo na farko ya yi ziyarar aiki a kasashen Malasiya da Singapore. Daga ranar 14 zuwa 15 ga wata, a kasar Singapore, Hu Jintao ya halarci kwarya-kwaryan taro a karo na 17 tsakanin shugabannin kasashe membobin kungiyar APEC, inda ya bayyana ra'ayoyi da matsayin da gwamnatin kasar Sin ke tsayawa a kai dangane da batutuwa da dama, ciki kuwa har da tinkarar rikicin hada-hadar kudi na duniya, da farfado da tattalin arzikin duniya, da nuna goyon-baya ga bunkasuwar tsarin yin ciniki na bangarori daban-daban, gami da inganta hadin-gwiwar sassa daban-daban da sauransu.(Murtala)