2020-07-20 21:24:22        cri

Kwanan baya, labarin da aka bayar dangane da yadda gwamnatin kasar Amurka take duba yiwuwar haramtawa dukkan 'yan jam'iyyar Kwaminis ta kasar Sin, JKS da iyalansu shiga kasar, ya haifar da suka daga akasarin ra'ayoyin jama'a a ciki da wajen Amurka. Kwararru sun yi nuni da cewa, ta da tsokana da 'yan siyasan Amurka suka yi bai dace da burin jama'ar kasashen 2 ba, kuma bai yi daidai da ci gaban duniya ba. Ga alama tunanin McCarthyism wato ra'ayin rikau ya dawo a Amurka, lamarin da ya kamata kasashen duniya su sa kulawa sosai a kai. Haka kuma wannan abin bakin ciki ne ga Amurka a zamanin yau.

Sanin kowa ne cewa, fahimta da mutunta juna suna da matukar muhimmanci wajen yin mu'amala a tsakanin kasa da kasa. Halin musamman mafi muhimmanci da kasar Sin ke da shi shi ne Jam'iyyar Kwaminis ta kasar Sin ce ke mulkin kasar, lamarin da tun tuni kasashen Sin da Amurka suka kulla huldar jakadanci a tsakaninsu, kuma Amurka ta san da haka sosai. Amma yanzu wasu 'yan siyasan Amurka sun kawar da kai daga muhimman ka'idojin kulla huldar diplomasiyya a tsakanin manyan kasashe da kuma raya hulda a tsakanin kasa da kasa, sun nuna kiyayya ga JKS. Hakika sun nuna kiyayya ga jama'ar Sin da yawansu ya kai kashi 1 cikin kashi 5 na yawan al'ummar duniya. Wannan rashin hankali ne da ma rashin basira.

Yanzu haka kasashen duniya suna bin hanyar samun ci gaba cikin lumana. Tun tuni an yi watsi da tunanin McCarthyism, inda aka nuna kiyayya ga tunanin Kwaminisanci. 'Yan siyasan Amurka, wadanda suke kokarin dawo da tunanin McCarthyism, idan ba su gaggauta dakatar da abin da suke ba, tabbas ba za su yi nasara ba. (Tasallah Yuan)