2019-12-28 17:27:22        cri

Shekarar 2019 shekara ce ta 6 da kasar Sin ta bullo da muhimmiyar shawararta wato "ziri daya da hanya daya". Kawo yanzu, kasar Sin ta sanya hannu tare da kasashe 137 da kungiyoyin kasa da kasa 30 kan takardun hadin-gwiwa 197 na raya ayyukan shawarar "ziri daya da hanya". Inganta ayyukan shawarar na taimakawa sosai ga ci gaban tattalin arzikin nahiyoyin duniya, ciki har da yankunan Asiya da Turai da Afirka da nahiyar Amurka da kuma nahiyar Oceania. Har wa yau, inganta shawarar "ziri daya da hanya daya" na daya daga cikin muhimman batutuwan da shugaba Xi ya tattauna tare da shugabannin sauran kasashen duniya lokacin da yake ziyara kasashen a shekara ta 2019.

A watan Maris din bana, shugaba Xi ya yada zangonsa na farko a kasar Italiya, inda kasashen biyu suka rattaba hannu kan takardar bayani ta inganta ayyukan shawarar "ziri daya da hanya daya". A watan Nuwambar bana kuma, yayin da yake ziyara kasar Girka, Xi da takwaransa na kasar sun cimma matsaya kan inganta hadin-gwiwar kasashensu a wannan fanni.

Har wa yau, a babban dandalin tattaunawa karo na biyu na hadin-gwiwar kasa da kasa kan shawarar "ziri daya da hanya daya" da aka yi a watan Afrilun bana a Beijing, shugaba Xi ya gabatar da wani muhimmin jawabi ga mahalarta taron sama da dubu shida, inda ya ce, ya kamata a kara maida hankali a fannin raya ayyukan shawarar "ziri daya da hanya daya", domin neman ci gabansu mai inganci kuma yadda ya kamata.(Murtala Zhang)