2019-09-16 10:22:11        cri

Ma'aikatar raya al'adu da yawon bude ido ta kasar Sin, ta ce jimilar Sinawa miliyan 105 ne suka yi bulaguro a fadin kasar, yayin hutun kwanaki 3 na bikin tsakiyar kaka na bana, da aka fara daga ranar Juma'ar da ta gabata.

Ma'aikatar ta ce adadin ya nuna karuwar kaso 7.6 a kan na makamancin lokacin bikin a bara.

Alkaluman da ma'aikatar ta fitar, sun nuna cewa kudin shigar da aka samu daga yawon bude ido a cikin gida yayin hutun, ya kai yuan biliyan 47.28, kwatankwacin dala biliyan 6.7, wanda ya karu da kaso 8.7 a kan na bara.

Yayin hutun, an gudanar da shirye-shirye da dama dake nuna muhimmancin raya zumunci da kishin kasa da al'adun Sinawa na gargajiya a fadin kasar.

Ana gudanar da bikin tsakiyar kaka ne ta hanyar sada zumunci tsakanin iyalai da kallon wata da cin wainar wata da sauran wasu al'adu. (Fa'iza Mustapha)