MDD ta bude taro na farko game da muhallin halittu, domin warware kalubalan da ake fuskanta yayin da ake raya birane a sassan duniya daban daban.

Taron wanda aka bude a ranar Litinin a birnin Nairobin kasar Kenya, ya hallara mahalarta sama da 3,000, ciki hadda shugabannin kasashe hudu, da sama da ministocin kasashe 40, da manyan wakilan wasu karin kasashen duniya 116, inda aka tattauna game da dabarun inganta rayuwar al'umma mazauna birane, a gabar da biranen duniya ke dada dunkulewa waje guda.

Taron dai na da taken "kirkire kirkire domin inganta rayuwa a birane da ta al'ummu " zai kuma gudana ne tsakanin ranar Litinin 27 ga wata zuwa 31 ga watan Mayu.

Da take jawabi yayin bikin bude taron a jiya Litinin, babbar daraktan hukumar UN-Habitat mai lura da muhallin halittu Maimunah Mohd Sharif, ta ce akwai hasashen dake nuna cewa, nan da shekarar 2050, kaso 70 bisa dari na al'ummun duniya za su rika rayuwa ne a birane, wanda hakan ka iya haifar da kalubale ga wasu kasashen a fannin samar da muhimman ababen more rayuwa, kamar gidajen kwana, da sufuri, da ayyukan yi, da ilimi, da lafiya da dai sauran su.

A don haka jami'ar ta yi kira ga mahukunta, da su sanya batun gina ingantattun birane masu dorewa, a matsayin jigon kudurorin ci gaban kasashen su. Kaza lika su aiwatar da sabbin dabarun kyautata birane, da karfafa tsarin gudanar da birane, da tsarin wanzar da ci gaban birane bayan kafuwar su.(Saminu)