Sunan tsohon nan shi ne Wang Zhi,yana zama a cikin wani kauyen dake cikin dazuzzukan da ke cikin duwatsu na gundumar Jinxian ta lardin Anhui a yankin tsakiya na kasar Sin, ko da ya ke ya tsufa,amma ya nuna kauna da sa kulawa ga yara manyan gobe namu, har ma ya kafa wani gida mai kyau ga yaran da iyayensu suka tafi aiki waje da wuraren mahaifinsu.To sai ku ji labaran da aka kawo dangane da wannan tsoho. Shi ne Mr Wang Zhi wanda ya cika shekaru 75 da haihuwa a wannan shekarar da muke ciki.A shekara ta 1994 ne ya yi ritaya daga mukamin mataimakin shugaban dakin kula da al'adu na gundumar Jinxian ta lardin Anhui,daga baya ya koma kauyensa Gufeng na yankin Changqiao inda aka haife shi.wani caji-ofis ya gayyace shi aiki a matsayin mashawarcin harkokin shari'a saboda yana da ilimi mai zurfi wajen shari'a da ya ba da hannu wajen warware matsalolin laifuffukan da matasa suka aikata.A wannan lokaci Mr Wang Zhi ya gano cewa yaran da iyayensu ke ci rani sai kara yawa suke a kauyuka saboda iyayensu su ci rani su yi aiki a birane. Wadannan yara sun gaza samun ci gaban da ake zato wajen karatu. wasu ma sun lalata saboda iyayensu ba su gida,sun rasa kauna da kulawa.wasu ma sun aikata kanana laifuffuka.Mr Wang Zhi ya ce."kakanin yara mutane ne da suka fi tsufa,ba su da ilimi sosai,kuma ba su sa lura kan ci gaban zamani da al'umma,ba su da hanyoyin daidaici na yin hira da jikokinsu. Shi ya sa bayan makaranta,wadannan yara su kan yi abin yadda suka ga dama, cikin yawancin lokuta ba wanda ya kula da su."

Bayan da ya iske wannan al'amari,Mr Wang Zhi ya yi bakin ciki ya kuma nuna damuwarsa. Tarihin aikinsa a sahen tushe ya gaya masa cewa yara kamar bishiyoyi ne,sai a sa lura tun lokacin da suke kanana. Da ganin haka ya dauki nauyin kula da yara bisa wuyansa. Yana so ya kafa wani gidan renon yara musammman domin yaran da iyayensu suka ci rani suke aiki a birane,ya tattara yaran gu daya. Ya sa kulawa da ba da taimako ga yara wajen zama da karatu.Da ya samu wannan ra'ayi,sai a yanayin rani na shekara ta 1998 ya kinkintsa yara fiye da goma da su yi karatu tare da sauran ayyuka bayan makaranta,ya samu sakamako mai amfani. A shekara ta biyu Mr Wang Zhi ya fadada gidansa na yara,iyayen yaran da suka samu labarin gidan sun aika da yaransu zuwa gidan saboda gidan yaran ya yi suna a bangaren nan,daga baya gidan ya dauki yaran sama da dari.

Ci gaban da Mr Wang Zhi ya samu wajen shirya sansanin ci rani na yara a lokutan hutu na yanayin zafi ya karfafa masa kwarin gwiwa. Tare da taimakon gwamnatin wuri da na iyalinsa,Mr Wang Zhi ya zuba kudin Sin Renminbi dubu dari ya yi amfani da dakunan da wata masana'antar ta bari,ya kafa wata cibiyar ba da taimakon ilimi domin yaran da iyayensu suka ci rani suke aiki a wurare masu nesa da kauyukansu.