A dakin cin abinci na Qungjude, a kan yanke naman gasasshiyar agwagwa ta hanyoyi 3, ciki har da tsalar naman agwagwar tare da fatarta. Wang Rong ya gaya cewa, a da ba a yanke namen gasasshiyar agwagwa zuwa tsala ba, dalilin da ya sa haka shi ne domin 'A shekarun 1960, Zhou Enlai, tsohon firayim ministan kasar Sin ya gayyaci bakin da suka zo daga kasashen waje don ci abinci a dakin cin abinci na Quanjude. Baki daga kasashen waje su kan yi amfani da cokali mai yatsu, ba su iya amfani da tsinke wajen cin abinci ba. Shi ya sa Mr. Zhou ya shawarci a yanke naman gasasshiyar agwagwa zuwa tsala, ta haka ana iya nannade naman gasasshiyar agwagwa da waina mai laushi cikin sauki, kuma ana iya ci cikin sauki.'

Tun daga nan aka gaji irin wannan hanyar yanke naman gasasshiyar agwagwa a dakin cin abinci na Quanjude. Biyan bukatun masu cin abinci daga kananan fannoni ya nuna cewa, jama'ar Sin suna nuna wa baki kyakkyawar maraba.

Gada fasahohi da hanyoyi da kuma al'adun gargajiya tare da samun kirkire-kirkire ita ce muhimmiyar hanya da dakin cin abinci na Quanjude ke bi wajen ci gaba da yin suna a gida da kuma waje a cikin shekaru 100 ko fiye bayan kafuwarsa. Mr. Wang ya kara da cewa,'Alal misali, wata agwagwa ta kan bukaci kiwonta kwanaki 45 domin cancanta gasawa a yanzu, a maimakon kwanaki 60 a da. Kuma muna tsara tsauraran ma'auni kan zaben danyun abubuwa daga karin fannoni. Ban da wannan kuma, mu kan dauki mintoci 50 zuwa awa 1 wajen gasa wata agwagwa a maimakon mintoci 45 a da. Ta haka, kitse da kuma miya da ke cikin agwagwar za su kara hadewa da juna bayan da aka gasa ta, agwagwar za ta kara dadin ci.'

A watan Yuli na wannan shekara, dakin cin abinci na Quanjude ya kaddamar da wata takardar abinci ta wasannin Olympics. Mr. Wang ya yi karin bayani da cewa, an dauki kusan shekara guda domin fito da wannan takarda. Dakin cin abinci na Quanjude ya kyautata abinci da yawa da ke kan wannan takarda bisa dandanon da mutanen waje suke so. Ya ce,'Bisa fasahohinmu, mun fara ajiye wasu kayan kamshi da a kan yi amfani da su cikin abinci irin na yammacin duniya a cikin abincin da muke samarwa. Alal musali, mun dafa hantar agwagwa tare da man shanu. Nufinmu shi ne biyan bukatun mutanen kasashen waje da kuma kara saninsu kan abinci irin na kasar Sin da kuma nuna musu al'adun kasar Sin mai dogon tarihi ta fuskar abinci.'