Ko shakka batu rangwamen da Palasdinu da Isra'ila suka yi ya bude hanya ga yin shawarwari da dama tsakanin bangarorin biyu kafin a gudanar da taron kasa da kasa kan batun Gabas ta Tsakiya. A watan jiya, shugaba Bush na Amurka ya yi kiran gudanar da taron kasa da kasa kan batun Gabas ta Tsakiya don ingiza yunkurin shimfida zaman lafiya a wannan shiyya. Ana sa ran za a gudanar da wannan taro a watan Nuwamba na shekarar da muke ciki. Jiya a Ramallah, Madam Rice ta fadi cewa, shugaba Bush ya yi kiran gudanar da wannan taro ne domin yana fatan bangarorin biyu za su yi shawarwari irin na zahiri a kokarin kafa kasar Palasdinu tun da wuri. Bangarorin biyu sun yarda da yin shawarwari a tsanake kafin a gudanar da wannan taro tare da bayyana aniyarsu ta tabbatar da shirin manyan tsare-tsare a game da batun kafa kasar Palasdinu da kuma aza harsashi ga gudanar da wannan taro cikin nasara.