2020-10-04 21:15:38        cri

A shekara ta 2018, Iwasaki Haruka, wadda ba ta jin yaren Sinanci, ta zo kasar Sin, domin zama wata 'yar aikin sa-kai a wani asibiti dake Beijing. Ta ce, kafin ta zo kasar Sin, ba ta san kasar Sin sosai ba, mutanen Japan ma ba su fahimci kasar Sin sosai ba. Domin bayyanawa mutanen Japan abun da ta ji ta gani a kasar Sin, Iwasaki Haruka ta wallafa zane-zanen da ta yi a kafar Intanet, domin mutane su kara fahimtar kasar Sin.

Sunan zane-zanen da ta yi Xiang Xiang, inda suka nuna yadda wata ma'aikaciyar jinya 'yar Panda take aiki da zaman yau da kullum da sauran wasu labarai masu ban sha'awa.

A da Iwasaki Haruka ta yi shirin kammala aikinta na sa-kai a Beijing a watan Yulin bana, amma saboda aukuwar cutar COVID-19, ta dawo kasar Japan a karshen watan Janairu. Bayan da ta koma kasarta, har kullum ta kan maida hankali kan yadda kasar Sin take yaki da cutar.

Iwasaki Haruka ta kuma kara wasu abubuwa a cikin zane-zanen da ta wallafa, wato 'yar Panda Xiang Xiang ta fara fadakar da al'umma kan ilimin da ya shafi kandagarkin cutar COVID-19, ciki har da sanya abun rufe baki da hanci, da wanke hannu da sauransu. Kana, Xiang Xiang ta kan karfafa gwiwa ga ma'aikatan jinyar kasar Sin. Wadannan zane-zanen sun samu karbuwa sosai a shafin sada zumunta, inda mutanen kasar Sin da dama suka godewa Iwasaki Haruka, saboda goyon-bayanta musamman a matsayin wata bakuwa 'yar kasar waje.(Murtala Zhang)