2020-09-03 20:26:47        cri

Yankin Qianjiang da ke kudu maso gabashin birnin Chongqing, wata gunduma ce wadda a baya ta yi fama da kangin talauci. A unguwar Shengdi, inda ofishin mahukuntan garin Heixi a yankin Qianjiang yake, akwai magidanta 1350, a cikinsu kuma wasu mutane 620 daga magidanta 170 sun taba fama da kangin talauci.

Akwai tuddai da kwari a unguwar Shengdi. Mazauna wurin suna zama a wani wuri maras fadi a cikin tuddai. Kwamitin kula da harkokin unguwar da kuma kungiyar da aka tura zuwa kauyen sun yi nazari kan halin musamman na yanayin kasa a wurin. Inda suka taimaka wa masu fama da kangin talauci raya sana'ar kiwon dabbobi. Ya zuwa watan Disamban shekarar 2019 da ta wuce, an fitar da dukkan mutanen dake unguwar daga kangin talauci.

Mahukuntan unguwar Shengdi sun yi amfani da halin musamman na unguwar, da fifikon da ake da shi a wurin, inda suka kara raya sana'ar kiwon dabbobi, lamarin da ya kara yawan kudin shiga da masu fama da talauci suke samu, tare da karfafa musu gwiwar samun wadata ta hanyar yin aikin tukuru da fita daga kangin talauci. Wadanda a baya suka yi fama da wahalar talauci sun yi aiki tukuru, suka kuma kara kokarin da suke yi don kyautata rayuwarsu, yanzu suna jin dadin zamansu rayuwarsu. (Tasallah Yuan)