2019-10-31 10:25:21        cri

Jami'an lafiya a Najeriya sun sanar a jiya Laraba cewa annobar cutar zazzabin yellow fever, ko shawara, ta yi sanadiyyar rayuka 24 a jahar Katsina dake shiyyar arewa maso yammacin kasar.

Kabir Mustapha, babban sakataren ma'aikatar lafiyar jahar Katsina yace, domin daukar matakan rigakafin cutar, gwamnatin jahar ta samar da alluran riga kafi kimanin miliyan 7, kawo yanzu, an riga an yiwa mutane miliyan 6.3 alluran riga kafin cutar tsakanin 'yan watanni 9 zuwa shekaru 44 da haihuwa.

Babu wani magani takamaimai na warkar da cutar, duk da kasancewar ana iya yin rigakafin kamuwa da cutar ta hanyar amfani da alluran rigakafin cutar zazzabin ta yellow fever, inda zasu samar da garkuwa ga jikin dan adam.