2019-09-29 21:10:56        cri

Zuwa karshen shekara ta 2018, 'yan wasan motsa jiki na kasar Sin sun lashe gasannin kasa da kasa har 3458, wadanda suka karya bajintar duniya har sau 1332. Nasarorin da 'yan wasan motsa jiki na kasar Sin suka samu, sun taimaka sosai ga bunkasuwar sana'ar motsa jiki ta kasar. A halin yanzu, a kowace shekara, a kan shirya manyan gasannin kasa da kasa sama da dari biyu a kasar ta Sin, kuma jimillar kudin sana'ar motsa jiki ta kasar ta zarce Yuan triliyan biyu a shekara ta 2017.

Bayan da aka kafa Jamhuriyar Jama'ar kasar Sin, ya zuwa yanzu, an kafa wani salon musamman na bunkasa harkokin motsa jiki wanda ke ba wa "wasannin Olympics" fifiko. A gasar wasannin Olympics wadda aka yi a shekara ta 2008 a Beijing, 'yan wasannin kasar Sin sun samu lambobin zinariya guda 51, abun da ya sa kasar ta zama ta farko a kasashen da suka samu lambobin zinariya. Amma duk da haka, a wasu wasannin motsa jiki, 'yan wasan kasar Sin ba su kai na sauran kasashen duniya karfi ba, ciki har da kwallon kafa da kwallon kwando da guje-guje da tsalle-tsalle. A 'yan shekarun nan, gwamnatin kasar Sin na himmatuwa wajen canza salon bunkasa harkokin wasan motsa jiki, da kara karfafawa al'umma gwiwar motsa jiki. A halin yanzu, kasar Sin na ci gaba da kokarinta don gina babbar kasa mai karfin gaske a fannin wasannin motsa jiki. (Murtala Zhang)