2019-07-31 20:12:26        cri

Shugaban kasar Sin, kuma babban sakataren kwamitin kolin JKS Xi Jinping, ya jaddada muhimmancin zage damtse wajen aiwatar da gyare-gyare don karfafa rundunar sojojin kasar, ta yadda za ta daga matsayin ta, har ta kai ga zama runduna mai karfi a sabon zamani da ake ciki.

Xi ya yi wannan kira ne a jiya Talata, yayin da yake jagorantar zaman nazarin ayyukan da suka shafi gudanar da gyare-gyare ga rundunar sojojin kasar ta Sin, da sauran hukumomin rundunar, wanda ofishin hukumar siyasa ta kwamitin kolin JKS ya shirya.

Yayin zaman, wanda ya gudana gabanin ranar sojoji ta kasar Sin dake tafe a ranar 1 ga watan Agusta, a madadin kwamitin kolin JKS, da hukumar rundunar sojojin kasar, shugaba Xi ya gabatar da gaisuwar sa ga daukacin jami'an rundunar sojojin kasar ta PLA, da 'yan sanda masu dauke da makamai, da jami'an da ake tanada domin ayyukan ko ta kwana. (Saminu)