Kasar Sin ta ci gaba da zama a kan gaba a fannin cinikayyar hajoji ta yanar gizo
2021-01-20 11:52:09 CRI
Alkaluman da ma’aikatar kasuwancin kasar Sin ta fitar jiya Talata na nuna cewa, yawan hajojin da kasar ta sayar ta kafar intanet, ya karu da kaso 14.8 cikin 100 bisa makamancin lokaci na bara, adadin da ya kai kudin Sin RMB Yuan triliyan 9.8, kwatankwacin dalar Amurka triliyan 1.5 a shekarar 2020.
Wannan na nuna cewa, kasar Sin ta kasance babbar kasuwar sayar da hajoji ta Intanet a duniya cikin shekaru 8 a jere. Yawan hajojin da kasar ta sayar ta intanet, ya kai kaso 24.9 na yawan hajojin da kasar ta sayar a shekarar da ta gabata.
A shekarar 2020, cinikayyar Intanet ta kafar bidiyo kai tsaye ya samu karbuwa, inda aka gudanar da harkokin cinikayya sama da miliyan 20 kai tsaye ta kafar bidiyo.
Alkaluman ma’aikatar sun kara nuna cewa, yawan kayayyakin da kasar ta shigo da su daga ketare, shi ma ya karu da kaso 8.2 cikin dari kan na bara, inda darajarsa ta kai Yuan triliyan 1.57.(Ibrahim)
Labarai Masu Nasaba
- Cinikin Sin da kasashen waje ta intanet zai kai dala triliyan 3 a 2022
- Li Xiushan, wadda ke sayar da kaya ta intanet, ta nuna takalmin da ta saka.
- "Taurarin intanet" na taka muhimmiyar rawarsu, wajen kawar da talauci, da raya al’umma mai matsakaicin karfi
- UNICEF: 2 bisa 3 na yaran ‘yan makaranta ba su da sadarwar intanet a gida