Assalamu alaikum, jama'a masu sauraro, barkanku da war haka. Barkanmu da sake saduwa a wannan fili na "ilmin zaman rayuwa". Ni ce Kande ke gabatar muku da wannan shiri. A cikin shirinmu na yau, za mu yi muku wani bayani kan cewa, yin wasan Yoga kullum zai ba da taimako ga lafiyar jikin dan Adam.

Masu ilmin kimiyya na kasashen Sweden da Indiya sun gano cewa, yin wasan yoga yana iya kwantar da hankalin dan Adam, haka kuma yana iya kyautata halin lafiyar jikin mutanen da suke kamuwa da cututtukan da ke da nasaba da sauyin halitta.

Manazarta na kwalejin ilmin likitanci na SP da ke birnin Bikaner na kasar Indiya sun yi bincike ga baligai 101 da suke kamuwa da cututtukan da ke da nasaba da sauyin halitta domin kimanta rawar da yin wasan yoga ke takawa kan kyautata lafiyar jikinsu. A cikin binciken, mutane 55 sun yi wasan yoga har watanni uku, sauran kuma sun shiga wani rukuni daban wajen samun jiyya na yau da kullum.

Kuma manazarta sun bayyana cewa, tsawon kugu na mutanen da suka yi wasan yoga da yawan karfin jininsu da kuma yawan sukari da ke cikin jininsu sun yi kadan inda an kwatanta da na rukunin daban.

Ban da wannan kuma manazarta na jami'ar Karlstad ta kasar Sweden sun tabbatar da cewa, mutanen da ba su yi wasan yoga ba sun fi saukin nuna damuwa da ba?in rai idan an kwatanta da wadanda suka yi wasan yoga. Haka kuma sun nuna cewa, dalilin da ya sa yin wasan yoga yake iya kwantar da hankulan mutane shi ne sabo da watakila yawan sinadarin antioxidant da ke cikin jini zai samu karuwa yayin da yawan cortisol zai samu raguwa bayan da aka yi wasan yoga, wanda zai ba da taimako sosai wajen kyautata halin lafiyar jiki da kuma sassauta cututtukan da ke da nasaba da sauyin halitta.

To, masu sauraro, yanzu sai ku shakata kadan, daga baya kuma za mu ci gaba da gabatar muku da taimakon da yin wasan yoga ke samarwa ga lafiyar jiki. (10"??)

Bisa samakamakon farko na nazari da aka bayar a kasar Amurka, an ce, idan mutanen da suka kamu da ciwon sankarar mama suka yi wasan yoga yayin da ake yi musu jiyya ta hanyar magani ta yin amfani da haske, to za a ba da taimako ga lafiyar jikinsu.

Kwararrun cibiyar binciken ciwon sankara ta Anderson ta jami'ar Texas ta kasar Amurka sun bayar da wannan sakamako ne a gun taron shekara-shekara na kungiyar ciwon sankara ta Amurka. Manazarta sun nemi mata 62 da suke kamuwa da ciwon sankarar mama wadanda ake yi musu jiyya ta hanyar magani ta yin amfani da haske bayan da aka yi musu tiyata, kuma an raba wadannan mata da matsakaicin shekarunsu ya kai 52 da haihuwa cikin kungiyoyi biyu. Matan da ke cikin wata kungiya sun yi wasan yoga sau biyu a ko wane mako, sauran matan da ke cikin kungiyar daban ba su yi wasan yoga ba.