Masu karatu, in kuna sha'awar yin wasa da ruwa a cikin ruwa mai tsabta, to, wurin yawon shakatawa na wasan Olympic a kan ruwa da ke gundumar Shunyi ta birnin Beijing wuri ne mafi dacewa a gare ku.

Wurin yawon shakatawa na wasan Olympic a kan ruwa, wani filin wasa ne da za a yi shirye-shiryen tseren kwale-kwale da tseren kanan kwale-kwale da wasan ninkaya na gasar wasannin Olympic ta Beijing da kuma shirin tseren kwale-kwale na gasar wasannin Olympic ta Beijing ta nakasassu a watan Agusta na shekarar da muke ciki. Za a fito da lambobin zinariya 32 a gun gasar wasannin Olympic ta Beijing ta shekarar 2008 a nan, wadanda yawansu ya kai misalin kashi daya cikin kashi goma bisa jimlar lambobin zinariya da za a samu a gun gasar. Shi ya sa a gun gasar wasannin Olympic ta Beijing, wurin yawon shakatawa na wasan Olympic a kan ruwa zai zama na uku da za a fi samun yawan lambobin zinariya a nan, ban da cibiyar wasanni ta kasar Sin da kuma cibiyar wasan ninkaya ta kasar Sin. Wannan wurin yawon shakatawa a kan ruwa yana cikin gundumar Shunyi na arewacin birnin Beijing. A kan bukaci misalin rabin awa domin zuwa wannan wurin yawon shakatawa daga cibiyar birnin Beijing cikin mota.

Wurin yawon shakatawa na wasan Olympic a kan ruwa, filin wasa kan ruwa ne na farko a tarihin wasannin Olympic, inda ake iya samun ruwa mai saurin gangara da kuma mai gangara sannu sannu a wani filin wasa daya. Ta haka za a yi gasannin tseren kwale-kwale da tseren kananan kwale-kwale da kuma wasan ninkaya a cikin wannan filin wasa. Bayan gasar wasannin Olympic ta Beijing, za a yi gasanni na gida da na duniya da kuma horar da 'yan wasa a nan, haka kuma fararen hula za su iya shiga wannan filin wasa domin motsa jiki ko kuma harkokin nishadi.