2020-08-10 10:42:35        cri

Cibiyar nazarin tsare-tsaren kimiyya da aikin injiniya ta jami'ar Johns Hopkins (CSSE) ta bayyana cewa, adadin wadanda suka kamu da cutar numfashi ta COVID-19 a kasar Amurka ya zuwa Lahadi, ya zarce miliyan biyar.

A cewar cibiyar CSSE, ya zuwa karfe 9:36 na safiyar ranar Lahadi agogon Amurka, yawan wadanda suka kamu da cutar a kasar, ya karu zuwa miliyan 5,000,603, kana yawan wadanda cutar ta halaka ya kai 162,441.

Wani hasashe da cibiyar kula da harkokin kiwon lafiya da kididdiga (IHME) a jami'ar Washington, ta yi na nuna cewa, nan da ranar 1 ga watan Disamba dake tafe, cutar za ta halaka mutane da yawansu ya kai 295,011 a kasar.

A game da batun samar da alluran riga kafin cutar COVID-19 kuwa, darektan cibiyar cututtuka masu yaduwa ta Amurka, kana mamba a kwamitin yaki da cutar COVID-19 ta fadar White House Dr. Antthony Fauci, ya bayyana cewa, sakamakon gwajin allura da aka yi kan dabbobi da bil-Adama, sun nuna cewa, akwai tabbacin za a samar da riga kafin da ba shi da wani hadari kuma mai inganci, nan da karshen wannan shekara ko farkon shekara mai zuwa.(Ibrahim)