Rundunar sojojin Najeriya ta ce dakarun ta sun yi arangama da mayakan kungiyar Boko Haram a ranar Laraba, lamarin da ya kai ga hallaka mayakan Boko Harma 11, da kuma sojoji 5.

Rundunar ta ce mayakan Boko Haram sun yiwa dakarun ta kwantan bauna, a kusa da Jakana dake karamar hukumar Kaga ta jihar Borno a arewa maso gabashin kasar, lamarin da ya haifar da dauki ba dadi na tsawon mintuna kusan 20.

Babban hafsan dake jagorantar runduna mai yaki da 'yan ta'addan Boko Haram a yankin manjo janar Bulama Biu, ya shaidawa kamfanin dillancin labarai na Xinhua a birnin Maiduguri cewa, manyan sojoji 2, da kuma wasu jami'an rundunar 3 sun rasu yayin dauki ba dadin.

Biu ya ce bayan dan lokaci ana fafatawar, 'yan ta'addan sun tsere sakamakon ruwan wuta da suka sha daga dakarun soji.(Saminu)